Aðalskrivari til Føroya Náttúru- og Umhvørvisfelag (barsilsfarloyvisstarv)

Føroya Náttúru- og Umhvørvisfelag søkir eftir barsilsavloysara. 

Hevur tú hjarta fyri náttúruni og umhvørvinum, og dugir tú væl at samskipa og arbeiða sjálvstøðugt? Føroya Náttúru- og Umhvørvisfelag (FNU) søkir eftir einum eldhugaðum og skipaðum aðalskrivara at røkja eitt barsilsstarv frá 1. oktober 2025 til 1.august 2026. 

Um starvið: 

Sum aðalskrivari verður tú ein lyklapersónur í dagliga virkseminum hjá FNU. Starvið er fjølbroytt og mennandi og gevur tær møguleika at seta tín dám á arbeiðið og arbeiða fyri náttúruna og umhvørvið í Føroyum. 

Tú fert serliga at hava ábyrgd av at fremja eina verkætlan, sum felagið hevur fingið stuðul til, og annars at tryggja, at virksemi felagsins verður rikið og ment á einum skipaðum og virknum grundarlagi.  

Arbeiðsuppgávur: 

• At fylgja og fremja virkisætlanina hjá felagnum 

• At umsita skrivstovuna og samskipa virksemi felagsins 

• At fyrireika og fremja tiltøk, framløgur og tíðindaskriv 

• At samskifta við limir, myndugleikar, felagsskapir og almenningin 

• At framleiða kunningartilfar um náttúru- og umhvørvisviðurskifti 

• At dagføra heimasíðu og sosialar miðlar 

• At taka lut í politiskum arbeiði og hoyringum 

• At umsita roknskap og gera ársfrágreiðingar 

Vit vænta, at tú: 

• Hevur viðkomandi útbúgving og/ella royndir innan fyrisiting, samskifti ella náttúru-/umhvørvisøkið 

• Dugir væl at samskipa og arbeiða sjálvstøðugt 

• Hevur góð samstarvsevni 

• Hevur góðar samskiftisførleikar 

• Hevur kunnleika til føroyska samfelagið og náttúru/umhvørvisviðurskifti, og hevur lætt við at seta teg inn í uppgávur 

• Dugir at nýta vanlig KT-amboð (t.d. Word, Excel, teldupostskipanir, Canva, heimasíður o.s.fr.) 

• Dugir sera væl at samskifta á føroyskum, bæði í skrift og talu 

Tað er ein fyrimunur, um tú hevur royndir innan verkætlanarleiðslu. 

Vit bjóða: 

Vit bjóða tær eitt spennandi og fjølbroytt starv, har tú fært høvi at arbeiða sjálvstøðugt og arbeiða fyri náttúruni og umhvørvinum í Føroyum. Tú fært møguleika at seta tín dám á ein felagsskap í vøkstri, sum brennur fyri at verja føroyska náttúru og umhvørvi.  

Arbeiðsstaðið er á skrivstovuni í miðbýnum í Tórshavn, sum vit deila við Føroya Fuglafrøðifelag. Møguleiki er at arbeiða heimanifrá. 

Løn- og setanartreytir 

Talan er um eitt tíðaravmarkað fulltíðarstarv vegna barsilsfarloyvi. Starvið er frá 1. oktober 2025 til 1. august 2026 og verður lønt sambært avtalu.

Roknast kann við nakað av ferðing, og at arbeiðið til tíðir fellur uttan fyri vanliga arbeiðstíð. 

Umsóknarfreist 

Umsókn við CV, avriti av prógvum og øðrum skal sendast til FNU í seinasta lagi 17. august. Umsóknir skulu sendast til fnu@fnu.fo.  

Nærri upplýsingar um starvið fáast við at venda sær til Fíu Niclasen, aðalskrivara, á telefon 251290. 

Um Føroya Náttúru- og Umhvørvisfelag 

FNU var stovnað í 1980 og er ein felagsskapur, sum arbeiðir fyri at verja og varðveita náttúru og umhvørvi í Føroyum – bæði á landi og sjónum.

Vit verja náttúruna og umhvørvið – fyri teg, fyri okkum, og fyri komandi ættarlið.